ភ្នំពេញ៖ ថ្ងៃទី២៩ ខែកុម្ភៈ ឆ្នាំ២០២៤ សមាគមមិត្តយើងមានកិត្តិយស សូមជម្រាបជូនថា សមាគមបានចុះហត្ថលេខាលើអនុស្សរណៈនៃការយោគយល់ (MoU) រវាង សមាគមមិត្តយើង ជាមួយនឹង សាលា អេកូល អាំងទែណាស្សូណាល់ ដឹ គ័ហ្វហ្វៀ អេ អេស្តេទិក ក្រោមអធិបតីភាពរបស់ កញ្ញា ផាន់ សុនីតា ប្រធានគណៈកម្មាការប្រតិបត្តិសមាគមមិត្តយើង និង កញ្ញា អុឹង ពុទ្ធី នាយិកាសាលា អេកូល អាំងទែណាស្សូណាល់ ដឹ គ័ហ្វហ្វៀ អេ អេស្តេទិក នៅការិយាល័យសមាគមមិត្តយើង។
អនុស្សរណៈនៃការយោគយល់គ្នានេះ មានគោលបំណងបង្កើតនូវក្របខណ្ឌនៃកិច្ចសហប្រតិបត្តិការ រវាងភាគីទាំងពីរ ផ្តល់ជំនាញ បង្កើនជំនាញ ផ្លាស់ប្តូរជំនាញ និងបង្កើនផលិតភាពការងារ ដើម្បីធានាថា ការបណ្ដុះបណ្ដាលដែលនឹងរៀបចំតាមរយៈគម្រោងរបស់សមាគមមិត្តយើង នឹងមាន គ្រូ និងអ្នកជំនាញ គ្រប់គ្រាន់ក្នុងការបង្រៀន ដោយសាលា អេកូល អាំងទែណាស្សូណាល់ ដឹ គ័ហ្វហ្វៀ អេ អេស្តេទិក ដើម្បីអោយ យុវជន សិស្ស និស្សិត បុគ្គលស្វ័យនិយោជន៍ ដែលមានបំណងចង់ចាប់យកជំនាញខាង សក់ និងសម្រស់ ដែលអាចទទួលបានការងារ និងមុខរបរសមរម្យ និងមានស្ថិរភាពចំណូល។
