សមាគមមិត្តយើងបានរៀបចំយុទ្ធនាការ ជិះដើម្បីមិត្តយើង ដែលបាននាំយកកញ្ចប់ជំនួយ ចំនួន ២០០កញ្ចប់ ជូនដល់បងប្អូនដែលមានជីវភាពខ្វះខាតក្នុងតំបន់គំនរសម្រាមស្ទឹងមានជ័យ

នៅព្រឹកថ្ងៃព្រហស្បតិ៍ ១រោច ខែ ចេត្រ ឆ្នាំ ខាល ចត្វាស័ក ព.ស ២៥៦៦ ត្រូវនឹងថ្ងៃទី ០៦ ខែ មេសា ឆ្នាំ២០២៣ នេះ សមាគមមិត្តយើងបានរៀបចំយុទ្ធនាការ ជិះដើម្បីមិត្តយើង ដែលបាននាំយកកញ្ចប់ជំនួយដែលមានដូចជា (អង្គរ មី ទឹកត្រី ទឹកស៊ីអ៊ីវ ត្រីខកំប៉ុង និងម៉ាស់) ចំនួន ២០០កញ្ចប់ ជូនដល់បងប្អូនរស់នៅគំនរសម្រាមស្ទឹងមានជ័យសរុបទាំងអស់ចំនួន ១៧០ គ្រួសារ និងសិស្សានុសិស្ស ២០០នាក់ មានដូចជា នំបុ័ង ទឹកដោះគោ និងសំលៀកបំពាក់មួយចំនួន។យុទ្ធនាការជិះដើម្បីមិត្តយើង “Ride For Mett Yeung” របស់សមាគមមិត្តយើងនេះជាសកម្មភាពដ៏មានសារៈសំខាន់មួយ និងមានចក្ខុវិស័យវែងឆ្ងាយ ដើម្បីបង្ហាញពីទឹកចិត្តសប្បុរសធម៌ ដោយផ្តើមចេញពីការចែករំលែក ធនធានតាមលទ្ធភាពពីសមាជិកមិត្តយើង ដល់អ្នកដែលខ្វះខាត និងអ្នកធ្វើការងារក្រៅប្រព័ន្ធ។ 

ឆ្លៀតក្នុងឱកាសនេះសមាគមមិត្តយើង សូមថ្លែងអំណរគុណយ៉ាងជ្រាលជ្រៅចំពោះសប្បុរសជនដែលបានចូលរួមបរិច្ចាគជាថវិកា និងសម្ភារៈសូមជួបតែសេចក្ដីសុខពេញបរិបូរណ៍ ជោគជ័យគ្រប់ភារៈកិច្ច។ សូមជម្រាបថាសមាគមមិត្តយើង មានគោលបំណង ក្នុងការលើកកម្ពស់កម្រិតជីវភាពរស់នៅ ឱកាសការងារ អាជីវកម្ម មិត្តភាព សាមគ្គីភាព និងកសាងបណ្ដាញគាំទ្ររវាងអ្នកប្រកបការងារ ឬមុខរបររកចំណូលផ្ទាល់ខ្លួន អ្នកជំនាញបច្ចេកទេស អ្នកបម្រើផ្នែកសេវាកម្ម និងអ្នកប្រកបអាជីវកម្មផ្សេងៗទាំងនៅក្នុង និងក្រៅប្រទេស ជាពិសេសការងារសង្គម ក៏ដូចជាការងារសប្បុរសធម៌នានា ដើម្បីជាការរួមចំណែកអភិវឌ្ឍន៍ប្រទេសជាតិ។